& كايزن خطييير مع الزووووووج & للاخت روعة انثى

كايزن الزوج

غريبة صح ...........معاي راح نكايزن الزوج

كل شي ممكن ومتاح طالما تفكري في الأفضل

تعالي أوضح لك الفكرة الأساسية

نبغى نلغي كل التعاملات السلبية

التي تخلق التوتر أو حتى لجرد أنها غير مفيدة

شفتي كيف الدقة ؟؟؟

يمكن تتخيلي إنه تطبيق هذا الكلام صعب

أو انه يفقدك البساطة والتعامل وفق طبيعتك

أقولك بكل صراحة مافي أسهل من تطبيق هذا الكايزن

ونتايجه تنعكس على حياتك كلها

هي مجرد نقاط جوهرية لو التزمتي فيها مدة من الزمن

تتعودي عليها وتكوني انت بنفسك حريصة عليها من غير توصية

1- في عقلك يوجد ملفات منوعة مرتبة فيها المعلومات بصورة دقيقة

ومصنفة في مجموعات مثلا في ملف يحتوي جميع الذكريات السعيدة

التي جمعتك بزوجك .......وملف يحتوي على كل الذكريات التعيسة

وهكذا

عندما تتهمين زوجك بالتقصير معك أو تنتقدينه مثلا

يقوم هو بفتح ملف مماثل لما قمت بفتحه

أي يفتح الملف الموجود في عقله والخاص بجميع صفاتك السيئة

ويبدأ في استخدامه لكي يدافع عن نفسه

حتى انك تستغربي أحيانا

وتردي عليه وتقولي له ايش دخل هذي في هذي !!!

لا تفتح موضوع ثاني

لكن ما يهدأ الوضع لأن الملفات المفتوحة في عقلك وعقله

هي ملفات سلبية تضم كل المواقف السيئة

ويستمر الجدال والنقاش بينكما

ويتطور الوضع بشكل سريع

ويفتح هو مواضيع يمكن ما عاتبك عليها في وقتها

لكنها مخزنة في الذاكرة واستدعاها حتى يقوي موقفه

وتستغربي انه يكلمك فيها الآن

ويمكن تقولي له

طيب ليش ما قلت من قبل ؟؟؟

في هذه الحالة لا تنتظري منه انه يقفل الملف السلبي

الذي يحتوي على لومه لك

وبادري انت بنفسك إلى قفل الملف الموجود في عقلك

وافتحي الملف الذي يحتوي على صفاته الطيبه

مثلا قولي أنا عارفة انك ماتقصد تقصر علي

وانك لما تقدر تكرمني على الآخر

الله يخليك لي ويخليني لك

أهم شي اننا متفاهمين والحمد لله اننا مبسوطين مع بعض

وهذي أمور بسيطة إن شاء الله تنحل بسهولة

هينا يفتح هو الملف الخاص بمدحك

ويتفاعل مع كلامك وتتفاجئي ان الخصام انتهى

وكأنه ماكان في شي أصلا

بينما لو استمريت في محاولة اثبات ان كلامك صح

وهو الغلطان ويحتاج يراجع نفسه ماراح يستجيب لك

ويمكن يتفاقم الوضع ويصير فيها زعل يستمر ليوم

أو يومين والسبب أصلا كان تافه مايستحق

وتخسري وقت حلو كان يمكن تنبسطي فيه

وتخرجي كسبانه وتسمعي كلام حلو غير الراحة النفسية

لما يكون بينكم رضا

والآن بعد ما فهمت طريقة عمل العقول

انتبهي من الأصل لا تدخلي هذي المتاهة

وتجنبي توجيه العتب المباشر

بس ما أحد يضمن الوقوع في الخطأ

لو حصل على طول تذكري الكلام اللي فوق

وطبقي وادعي لي

2- يمكن تسأليني

إذا كان ممنوع اني أعاتبه نهائيا

كيف ممكن يتحسن ........أو يتجنب الأخطاء

أقولك في الحالات القصوى جربي طريقة الساندويتش

فهي طريقة آمنة نوعا ما وخسائرها قليلة جدا

شبهت هذه الطريقة بالساندويتش

لأن المقصود يكون في المنتصف يعني الحشوة

ويكون في غلاف حلو من الجهتين

تبدأي بالمدح ثم تذكري العتب ثم تنتهي بالمدح

مثلا لما يقضي للبيت يتفلسف ويحضر أشياء مالها داعي

ويتجاهل أشياء مهمة

لو هاجمتيه مباشرة

أنا كم مرة أقولك جيب اللي في الورقة ؟؟

ضيعت الفلوس .......مو معقولة كذا

يكون في علمك هو اجتهد عشانك

ولما تنتقديه بهذا الأسلوب

يعني ماقدرتي اللي سواه

ويمكن يكره يجيب طلباتك بعد كذا

ويقول في نفسه مايعجبها شي

ليش أتعب نفسي

بينما انت مو عاجبك الوضع

وتبغي تنبهيه

تعالي في وقت رواقه

وقولي حبيبي تصدق ما أظن في أحد في كرمك

ذوقك روعة واختيارك للخضار

دايما يعجبني حتى الغدا اليوم طلع طعمه جنان

عارف ايش السبب ؟؟؟؟؟؟؟؟

تلاقي ابتسامته عريضه ومستمع لك وهو مستانس

حيسألك ليه ؟؟؟؟

قولي له لأنك انت اشتريت الأغراض وأنا طبخت

بس عارف ايش رايك في المشتروات اللي جبناها الفترة الأخيرة كلها نحتاجها أو لا؟؟

خاصة بالنسبة ل .............

حددي اللي تبغي .........هينا هو يقول اللي كنت بتكلميه فيه

ويغنيك عن اللوم

ولو ما قال انت تكلمي وقولي اللي في خاطرك

بس على شكل نقاش مو نصيحة

وفي الآخر قولي فديتك تعجبني أفكارك !!!!!!!

وتكوني وصلت للشي اللي تبغي

بدون مودا للمشاعر أو الوقت

3- راقبي أفكارك بدقة ........خليك حارس لا تسمحي للمشاعر السلبية

وسوء الظن تتسرب إلى عقلك

لأن الضريبة تكون عالية وتخسري الصفاء .......وأحيانا بل غالبا تكون أسباب زعلك وهمية

لتسرعك في اصدار أحكام قبل التأكد من الحقائق

أفهمك أكثر بمثال

لو تأخر زوجك عن موعد عودته ........أو مارد على اتصالك

لا تقولي في نفسك هو أساس مو مهتم في ........ولو كنت على باله كان اتصل من نفسه أصلا

في هذي الحالة انت ترسلي اشارات سلبية وذبذبات كهربائية منفرة تبعده عنك

وبدلا من ذلك تعلمي ترسلي اشارات ايجابية لأنها من جد تجذب حتى عن بعد 

حدثي نفسك انه يحبك وما رد عليك لأنه في سبب ضروري منعه 

وانه حيتصل عليك أو مايقدر 

وفعلا تلاقيه شوي يررررررررن عليك

والتجربة خير برهان

مريت في الإثنين ولاحظت النتايج

وطبقي هذا الكلام حتى وقت الزعل

قولي في نفسك هو ندمان ........وأكيد يجي يراضيني

هو مايستغني عني .....ويتمنى اني أتواصل معاه

والنتايج أنا أضمنها لك .......بس اتذكري كلامي

وبرمجي نفسك حتى تصيري محطة ارسال للموجات الإيجابية ههههههه

وبكذا تتخلصي من مودا الزعل بدون داعي

4- لما تطلبي من زوجك طلب أو تناقشيه في موضوع مهم

حددي طلب واحد في وقت واحد مناسب

حتى يتحقق ......لأنه كذا يركز معاك

أما لما تجيبي العيد كله مره وحده

ما تستفيدي شي أبدا .......بالعكس ممكن يقول في نفسه

لو حققت لها طلب واحد ماراح يبين بعينها

ولا حيعجبها .......وما يسوي لك شي نهائيا

5- اختاري الوقت المناسب دائما للكلام

مثلا يكون هو مشغول وعارفة انه مو متفرغ الآن

وتطلبي منه تصليح شغلة معينة في المنزل 

تكوني ضيعت وقت في حوار فاشل

انتظري حتى تشعري انه مستعد لتنفيذ رغبتك فورا

وقولي ماعندك......واستمتعي بالإستجابة المباشرة 

بدون تسويف 

ومن غير كلمة شايفتني فاضي دحين ؟؟

6- لا تطلبي حاجة وانت تقولي في نفسك

حاسة انه ماراح يوافق ........لأنه في هذي الحالة

سيكون أسلوبك مهزوز .......وفعلا ماراح يرضى

7- لا تذمي أهل زوجك أبدا مهما كانت الأسباب

سيدافع عنهم ويحاول يثبت حسن نواياهم

وعلى العكس جربي انك تمدحيهم 

وتركزي على صفاتهم وأفعالهم الحلوة

وهذي مع كل الناس أوجدي لهم العذر

واحتسبي ذلك لوجه الله

تتقربي من ربك ومن زوجك كمان وربي يسهل لك كل أمورك